కేకేఆర్ తో మ్యాచ్... పరుగులు చేయలేక ఢిల్లీ క్యాపిటల్స్ విలవిల

కోల్‌కతా నైట్ రైడర్స్‌తో మ్యాచ్‌లో ఢిల్లీ క్యాపిటల్స్ పరుగులు చేయలేక అల్లాడింది. మొదట బ్యాటింగ్ చేసి ఓ మోస్తరు స్కోరుకే పరిమితమైంది. టాస్ ఓడిన ఢిల్లీ బ్యాటింగ్ కి దిగింది. నిర్ణీత 20 ఓవర్లలో 8 వికెట్ల నష్టానికి 142 పరుగులు చేసింది. ఓపెనర్ పతుమ్ నిస్సంక (29 బంతుల్లో 50; 5 ఫోర్లు, 3 సిక్సులు) మెరుపు అర్ధశతకంతో రాణించగా, చివర్లో అశుతోష్ శర్మ (28 బంతుల్లో 39; 3 ఫోర్లు, 3 సిక్సులు) కీలక ఇన్నింగ్స్ ఆడాడు.

ఢిల్లీలోని అరుణ్ జైట్లీ స్టేడియంలో జరుగుతున్న ఈ మ్యాచ్‌లో కోల్‌కతా బౌలర్లు క్రమశిక్షణతో బౌలింగ్ చేసి ఢిల్లీ బ్యాటర్లను కట్టడి చేశారు. ఓపెనర్లు కేఎల్ రాహుల్ (23), నిస్సంక తొలి వికెట్‌కు 4.6 ఓవర్లలో 49 పరుగులు జోడించి శుభారంభం అందించారు. అయితే, రాహుల్ ఔటైన తర్వాత ఢిల్లీ ఇన్నింగ్స్ తడబడింది. నితీశ్ రాణా (8), సమీర్ రిజ్వీ (3), ట్రిస్టన్ స్టబ్స్ (2) స్వల్ప స్కోర్లకే వెనుదిరిగారు. ఒకవైపు వికెట్లు పడుతున్నా నిస్సంక దూకుడుగా ఆడి హాఫ్ సెంచరీ పూర్తి చేసుకున్నాడు.

మిడిల్ ఓవర్లలో కెప్టెన్ అక్షర్ పటేల్ (11) నిలకడగా ఆడేందుకు ప్రయత్నించినా పరుగులు రాబట్టడంలో విఫలమయ్యాడు. చివర్లో అశుతోష్ శర్మ ఒంటరి పోరాటం చేయడంతో ఢిల్లీ ఆ మాత్రం స్కోరైనా చేయగలిగింది. కోల్‌కతా బౌలర్లలో అనుకుల్ రాయ్, కార్తీక్ త్యాగి చెరో రెండు వికెట్లు పడగొట్టారు. స్టార్ స్పిన్నర్ సునీల్ నరైన్ 4 ఓవర్లలో కేవలం 17 పరుగులిచ్చి ఒక వికెట్ తీసి ఢిల్లీ స్కోరు వేగానికి బ్రేకులు వేశాడు. ఈ మ్యాచ్‌లో గెలవాలంటే కోల్‌కతా 143 పరుగులు చేయాల్సి ఉంది.